წესები და პირობები

ბოლო განახლება: 25 სექტემბერი, 2026 წელი

ძალაში შესვლის თარიღი: 25 სექტემბერი, 2026 წელი

დოკუმენტის რედაქცია: v1.5

1. ზოგადი დებულებები და თანხმობა

1.1. წინამდებარე წესები და პირობები (შემდგომში „წესები“) წარმოადგენს ორმხრივად სავალდებულო იურიდიულ ხელშეკრულებას პლატფორმის მომხმარებელსა (შემდგომში „მომხმარებელი“) და პლატფორმის მფლობელს შორის.

1.2. პლატფორმის ოპერატორი და მფლობელია ინდივიდუალური მეწარმე „გურამ თევდორაშვილი“, რეგისტრირებული საქართველოს კანონმდებლობის შესაბამისად (მისამართი: საგარეჯო, სოფელი მანავი; ელ. ფოსტა: hello@wildera.ge) (შემდგომში „მეწარმე“).

1.3. წინამდებარე წესები არეგულირებს მომხმარებლის მიერ მეწარმის ვებსაიტითა და აპლიკაციით (wildera.ge და app.wildera.ge, შემდგომში ერთობლივად მოხსენიებული, როგორც „პლატფორმა“) სარგებლობის პირობებს.

1.4. პლატფორმაზე რეგისტრაციით, ანგარიშის შექმნით, მასზე წვდომით ან მისი ნებისმიერი ფორმით გამოყენებით, მომხმარებელი ადასტურებს, რომ სრულად გაეცნო, გაიგო და უპირობოდ ეთანხმება ამ წესებს, აგრეთვე პლატფორმის კონფიდენციალურობის პოლიტიკას. თუ მომხმარებელი არ ეთანხმება ამ წესების რომელიმე პუნქტს, იგი უფლებამოსილია შეწყვიტოს პლატფორმით სარგებლობა.

2. პლატფორმის სერვისების აღწერა

2.1. პლატფორმა წარმოადგენს მონადირეებისა და მეთევზეებისთვის განკუთვნილ სპეციალიზებულ სოციალურ და საინფორმაციო სივრცეს. მისი ფუნქციონალი მოიცავს მაგრამ არ შემოიფარგლება:

2.1.1. მომხმარებელთა აქტივობისა და ტროფების ფიდს, ველური ბუნებისა და თევზების სახეობების საინფორმაციო ენციკლოპედიას, სანადირო და სათევზაო ზონების ინტერაქტიულ რუკას, თემატურ ფორუმებს/საზოგადოებებს, მომხმარებელთა შორის პირად მიმოწერას (ჩატს), ქულების (Wild) დაგროვებისა და გადაცვლის სისტემასა და სარეფერალო (მოწვევის) პროგრამას, აგრეთვე ფასიან (Premium) ფუნქციებს.

2.2. მომხმარებელი აცნობიერებს და ეთანხმება, რომ პლატფორმა ახორციელებს მხოლოდ საინფორმაციო და სოციალურ-საკომუნიკაციო მომსახურებას. გასათვალისწინებელია, რომ მეწარმე თავად არ ეწევა, არ უწევს ორგანიზებას და არ უწევს პოპულარიზაციას ნადირობას ან თევზაობას, არ ყიდის და არ გასცემს შესაბამის ლიცენზიებს, ნებართვებს, ვაუჩერებს ან მოწმობებს, არ ვაჭრობს სანადირო იარაღით ან/და აღჭურვილობით და არ წარმოადგენს სახელმწიფო ან მარეგულირებელ ორგანოს.

2.3. პლატფორმაზე შეთავაზებული ფასიანი პროდუქტი (Premium გამოწერა) წარმოადგენს მიმდინარე (უწყვეტ) ციფრულ მომსახურებას, რომელიც მომხმარებელს მიეწოდება გამოწერის მოქმედების მთელი პერიოდის განმავლობაში; მასზე წვდომა აქტიურდება თანხის გადახდისთანავე. ფასიანი სერვისებისა და პროდუქტების აქტუალური ფასები განთავსებულია პლატფორმის მთავარ გვერდზე, ხოლო ანგარიშსწორების დეტალური პირობები — გადახდის გვერდზე. პლატფორმაზე აგრეთვე ხელმისაწვდომია ერთჯერადი გადახდით შესაძენი, სამუდამო წვდომის პაკეტი (Loyality), რომელიც არ წარმოადგენს გამოწერას და ავტომატურად არ განახლდება (იხ. 7.5 პუნქტი).

3. ანგარიშის შექმნა და უსაფრთხოება

3.1. პლატფორმაზე რეგისტრაცია და ანგარიშის (პროფილის) შექმნა ნებადართულია მხოლოდ 18 წლის ასაკს მიღწეული, სრული ქმედუნარიანობის მქონე ფიზიკური პირებისთვის.

3.2. რეგისტრაციის პროცესში მომხმარებელი ვალდებულია მიაწოდოს მეწარმეს ზუსტი, სრული და უტყუარი პერსონალური მონაცემები და უზრუნველყოს ამ ინფორმაციის განახლება მისი ცვლილების შემთხვევაში.

3.3. მომხმარებელი სრულად არის პასუხისმგებელი მისი ანგარიშის საავტორიზაციო მონაცემების (ელ-ფოსტა, პაროლი) უსაფრთხოებასა და კონფიდენციალურობაზე. ნებისმიერი ქმედება, რომელიც განხორციელდება მომხმარებლის ანგარიშიდან, მიიჩნევა უშუალოდ ამ მომხმარებლის მიერ განხორციელებულად.

3.4. მომხმარებელი ვალდებულია დაუყოვნებლივ აცნობოს მეწარმეს ელ-ფოსტაზე (hello@wildera.ge) მისი ანგარიშის უნებართვო გამოყენების ან უსაფრთხოების ნებისმიერი სხვა დარღვევის ან/და ასეთი სავარაუდო ქმედების შესახებ.

3.5. მეწარმე არ იღებს პასუხისმგებლობას მომხმარებლის ანგარიშიდან განხორციელებულ ქმედებასთან დაკავშირებით. ეს გამორიცხვა არ ვრცელდება იმ შემთხვევებზე, როდესაც ანგარიშზე არაავტორიზებული წვდომა ან მომხმარებლისთვის მიყენებული ზიანი გამოწვეულია პლატფორმის უსაფრთხოების ხარვეზით, მეწარმის ბრალით (განზრახვით ან უხეში გაუფრთხილებლობით) ან მეწარმის მიერ კანონმდებლობით/ხელშეკრულებით ნაკისრი ვალდებულების დარღვევით.

4. აკრძალული ქმედება და კონტენტის განთავსების წესები

4.1. პლატფორმის გამოყენებისას მომხმარებელი იღებს ვალდებულებას, დაიცვას საქართველოს მოქმედი კანონმდებლობა და ეთიკის ნორმები. აკრძალულია ისეთი მასალის (ფოტო, ვიდეო, ტექსტი, გეოლოკაცია, კომენტარი) გამოქვეყნება, ატვირთვა ან გაზიარება, რომელიც:

4.1.1. ხელს უწყობს, ახალისებს, ასახავს ან ინსტრუქციას იძლევა უკანონო ნადირობაზე, თევზაობასა და ბრაკონიერობაზე. ბრაკონიერობა ნებისმიერი ფორმით მკაცრად აკრძალულია, მათ შორის აკრძალულია მასალა, რომელიც ეხება:

4.1.1.1. საქართველოს „წითელ ნუსხაში“ შესულ ან გადაშენების პირას მყოფ სახეობებზე ნადირობას;

4.1.1.2. ნადირობას/თევზაობას აკრძალულ პერიოდში (დახურულ სეზონზე);

4.1.1.3. საქმიანობას საქართველოს ტერიტორიაზე არსებულ სახელმწიფო ნაკრძალებში, აღკვეთილებსა და დაცულ ტერიტორიებზე შესაბამისი ნებართვის გარეშე;

4.1.1.4. კანონით აკრძალული იარაღის, ასაფეთქებელი ნივთიერებების, ელექტროშოკური აპარატების, ქიმიური საშუალებების ან მასობრივი განადგურების ბადეების გამოყენებას;

4.1.2. ამჟღავნებს ან ასაჯაროებს გადაშენების საფრთხის წინაშე მყოფი, საქართველოს „წითელ ნუსხაში“ შეტანილი ან სხვაგვარად დაცული სახეობების ადგილმდებარეობას (მათ შორის, გეოლოკაციას, კოორდინატებს ან ადგილმდებარეობის იდენტიფიცირების შესაძლებლობის მქონე სხვა მონაცემებს); ასეთი ინფორმაციის გასაჯაროება მკაცრად აკრძალულია;

4.1.3. ასახავს ცხოველთა მიმართ განსაკუთრებულ სადისტურ ან წამებით მოპყრობას, რაც სცილდება ლეგალური და ტრადიციული ნადირობის/თევზაობის საყოველთაოდ აღიარებულ და დაშვებულ სტანდარტებს;

4.1.4. შეიცავს ცრუ, ცილისმწამებლურ, შეცდომაში შემყვან ან თაღლითურ ინფორმაციას;

4.1.5. შეიცავს სიძულვილის ენას, დისკრიმინაციას (რასის, სქესის, რელიგიის, ეროვნების და ა.შ. ნიშნით), შეურაცხყოფას, მუქარას, ბულინგს ან შევიწროებას სხვა მომხმარებლების თუ მესამე პირების მიმართ;

4.1.6. არღვევს მესამე პირების საავტორო, მომიჯნავე, სასაქონლო ნიშნის ან ინტელექტუალური საკუთრების სხვა უფლებებს;

4.1.7. შეიცავს ვირუსებს, არასანქცირებულ კომერციულ რეკლამას, სპამს ან გამოიყენება პლატფორმის მუშაობის ხელოვნური მანიპულაციისთვის (ბოტების გამოყენება).

4.2. იარაღით ვაჭრობის აკრძალვა: პლატფორმის მეშვეობით მკაცრად აკრძალულია ნებისმიერი სახის იარაღის, საბრძოლო მასალის, მათი ნაწილების ან აქსესუარების ყიდვა, გაყიდვა, გადაცვლა, შეთავაზება, რეკლამირება ან ამგვარი გარიგების ორგანიზება/შუამავლობა, აგრეთვე ნებისმიერი მსგავსი საქმიანობის განხორციელება. აღნიშნული აკრძალვის დარღვევა გამოიწვევს მომხმარებლის ანგარიშის დაუყოვნებლივ დაბლოკვას და, საჭიროების შემთხვევაში, ინფორმაციის მიწოდებას შესაბამისი უფლებამოსილი სახელმწიფო ორგანოებისთვის.

4.3. დასაშვებია მხოლოდ სანადირო იარაღის განხილვა კანონიერად მოპოვებულ ნადავლთან ერთად — როგორც თემატურ ფორუმებში, ისე აქტივობის ფიდზე, სადაც იგი შესაძლოა გამოჩნდეს ფოტოს სახით. ასეთი განხილვა/გამოსახვა არ უნდა შეიცავდეს ამ მუხლით აკრძალული გარიგების შეთავაზების ან წახალისების ელემენტებს.

4.4. მეწარმე უფლებამოსილია, საკუთარი შეხედულებისამებრ, ყოველგვარი წინასწარი შეტყობინებისა და დასაბუთების გარეშე, წაშალოს ნებისმიერი კონტენტი, რომელიც არღვევს ამ წესებს, და დროებით ან სამუდამოდ დაბლოკოს დამრღვევი მომხმარებლის ანგარიში.

4.5. წინამდებარე მუხლით დადგენილი შინაარსობრივი აკრძალვები ვრცელდება არა მხოლოდ საჯაროდ გამოქვეყნებულ მასალაზე, არამედ მომხმარებელთა შორის პირად მიმოწერაზეც (ჩატზე). მეწარმე წინასწარ არ ეცნობა პირადი მიმოწერის შინაარსს და არ ახორციელებს მის მუდმივ მონიტორინგს; ამასთან, კონკრეტულ შეტყობინებაზე საჩივრის (დაფიქსირების) შემთხვევაში მეწარმე უფლებამოსილია განიხილოს იგი ამ წესების დარღვევის შეფასების მიზნით და გამოიყენოს 4.4 პუნქტით გათვალისწინებული ზომები.

5. მომხმარებლის მიერ გენერირებული კონტენტი და ლიცენზია

5.1. მომხმარებელი ინარჩუნებს საკუთრებისა და საავტორო უფლებებს იმ მასალაზე (ფოტოები, ტექსტები, პოსტები, დაკვირვების მონაცემები), რომელსაც იგი განათავსებს პლატფორმაზე.

5.2. პლატფორმაზე კონტენტის ატვირთვით/გამოქვეყნებით, მომხმარებელი ავტომატურად ანიჭებს მეწარმეს არაექსკლუზიურ, უსასყიდლო (უფასო), მუდმივ და შეუცვლელ და მსოფლიო მასშტაბით ლიცენზიას, რათა მეწარმემ შეინახოს მასალა, მოახდინოს ჩვენება, რეპროდუცირება, ადაპტირება, თარგმნა და პლატფორმის ციფრულ სივრცეში გავრცელება სერვისების მიწოდების, ტექნიკური გაუმჯობესებისა და პლატფორმის პოპულარიზაციის მიზნით.

5.3. მომხმარებელი თავად არის პერსონალურად და სამართლებრივად პასუხისმგებელი მის მიერ ატვირთულ კონტენტზე. მეწარმე არ ახორციელებს კონტენტის წინასწარ სავალდებულო ფილტრაციას და არ იღებს პასუხისმგებლობას მომხმარებელთა მიერ განთავსებული ინფორმაციის სისწორესა თუ ლეგალურობაზე.

6. ინტელექტუალური საკუთრება

6.1. პლატფორმის ვიზუალური ინტერფეისი, დიზაინი, გრაფიკა, საფირმო ნიშნები, ლოგოტიპები, პროგრამული კოდი, მონაცემთა ბაზები და თავად მეწარმის ადმინისტრაციის მიერ შექმნილი კონტენტი წარმოადგენს მეწარმის ექსკლუზიურ ინტელექტუალურ საკუთრებას და დაცულია საქართველოს კანონით „საავტორო და მომიჯნავე უფლებების შესახებ“ და სხვა მოქმედი ნორმატიული აქტებით.

6.2. პლატფორმაზე ინტეგრირებული სახეობების ენციკლოპედია და რუკები შესაძლოა იყენებდნენ მესამე მხარის ღია სამეცნიერო მონაცემთა ბაზებს (მაგალითად: GBIF, iNaturalist, eBird, FishBase, OpenStreetMap). მეწარმე უზრუნველყოფს ამ მონაცემების გამოყენებას შესაბამისი თავისუფალი ლიცენზიებისა (Creative Commons, ODbL და ა.შ.) და წყაროს მითითების წესების სრული დაცვით.

6.3. მეწარმის წინასწარი წერილობითი თანხმობის გარეშე, დაუშვებელია პლატფორმის ნებისმიერი კომპონენტის, შინაარსის ან კოდის უნებართვო კოპირება, მოდიფიკაცია, გავრცელება, კომერციული მიზნებისთვის გამოყენება ან საინჟინრო ანალიზი.

7. ფასიანი (Premium) გამოწერა, ანგარიშსწორება და გაუქმება

7.1. პლატფორმის გარკვეული სპეციფიკური ფუნქციები და გაფართოებული სერვისები ხელმისაწვდომია მხოლოდ ფასიანი (Premium) გამოწერის ფარგლებში. ფასიანი სერვისების აქტუალური ფასები განთავსებულია პლატფორმის მთავარ გვერდზე, ხოლო მიმდინარე ტარიფები, საანგარიშსწორებო პერიოდი და (Premium) პაკეტის დეტალური პირობები მოცემულია უშუალოდ გადახდის გვერდზე. ფასიანი (Premium) სერვისი წარმოადგენს მიმდინარე (უწყვეტ) ციფრულ მომსახურებას, რომელზე წვდომაც აქტიურდება თანხის გადახდისთანავე და გრძელდება საანგარიშსწორებო პერიოდის განმავლობაში. ყველა ფასი მითითებულია საქართველოს ეროვნულ ვალუტაში — ლარში (₾) და მოიცავს კანონმდებლობით გათვალისწინებულ ყველა გადასახადს. მითითებული ფასის გარდა მეწარმე მომხმარებელს დამატებით საკომისიოს არ აკისრებს.

7.2. ავტომატური განახლება: ფასიანი (Premium) გამოწერა ხდება ავტომატური განახლების პრინციპით. ყოველი საანგარიშსწორებო პერიოდის (ყოველთვიური ან ყოველწლიური) ბოლოს, მომდევნო პერიოდის საფასური ავტომატურად ჩამოიჭრება მომხმარებლის მიერ მითითებული საბანკო ბარათიდან, გარდა იმ შემთხვევისა, თუ მომხმარებელი გააუქმებს გამოწერას მიმდინარე აქტიური პერიოდის დასრულებამდე მინიმუმ 24 (ოცდაოთხი) საათით ადრე. მომდევნო პერიოდის საფასურის ჩამოჭრამდე მეწარმე მომხმარებელს წინასწარ აფრთხილებს პლატფორმის შიდა შეტყობინებით — როგორც წესი, მიმდინარე პერიოდის დასრულებამდე 7 (შვიდი) დღით და, განმეორებით, 1 (ერთი) დღით ადრე.

7.2.1. თუ ავტომატური ჩამოჭრა ვერ განხორციელდა (მაგალითად, ბარათზე არასაკმარისი თანხის, ბარათის ვადის ამოწურვის ან ბანკის უარის გამო), მეწარმე ჩამოჭრას გაიმეორებს არაუმეტეს 3 (სამი) მცდელობისა: პირველი წარუმატებელი მცდელობიდან დაახლოებით 1 (ერთი) დღის, ხოლო შემდეგ — დაახლოებით 3 (სამი) დღის შემდეგ. მცდელობების ამოწურვის შემდეგ ავტომატური განახლება ითიშება, ხოლო ფასიან ფუნქციებზე წვდომა უქმდება უკვე ანაზღაურებული პერიოდის დასრულებისთანავე. მომხმარებელი ყოველი წარუმატებელი მცდელობის შესახებ ინფორმირდება პლატფორმის შიდა შეტყობინებით და უფლებამოსილია ნებისმიერ დროს განაახლოს გადახდის საშუალება ან ხელახლა გაააქტიუროს გამოწერა.

7.3. ანგარიშსწორება: ფინანსური ტრანზაქციების უსაფრთხოებასა და დამუშავებას სრულად უზრუნველყოფს ლიცენზირებული მესამე მხარის საგადახდო პროვაიდერი (საბანკო დაწესებულება/საგადახდო პროცესინგი). მომხმარებლის საბანკო ბარათის სრულ ნომერსა და უსაფრთხოების კოდს (CVV/CVC) მეწარმე არ იღებს, არ ამუშავებს და არ ინახავს — ისინი შეიყვანება უშუალოდ საგადახდო პროვაიდერის გვერდზე.

7.3.1. ბარათის შენახვა ავტომატური განახლებისთვის: თუ მომხმარებელი შეძენისას ცალსახად დაეთანხმება ავტომატურ განახლებას, საგადახდო პროვაიდერი მეწარმეს გადასცემს განმეორებადი გადახდის იდენტიფიკატორს (ე.წ. ტოკენს), რომელსაც მეწარმე ინახავს დაშიფრული სახით. ტოკენთან ერთად ინახება მხოლოდ ბარათის ბრენდი, ბოლო 4 (ოთხი) ციფრი და მოქმედების ვადა. ტოკენი გამოიყენება მხოლოდ 7.2 პუნქტით გათვალისწინებული გამოწერის განახლებისთვის და სხვა მიზნით არ გამოიყენება.

7.3.2. ავტომატური განახლების გათიშვა ან გამოწერის გაუქმება ავტომატურად იწვევს შენახული ბარათის (ტოკენის) წაშლას. მომხმარებელს ნებისმიერ დროს შეუძლია წაშალოს შენახული ბარათი პროფილის პარამეტრებიდან; ეს არ აისახება უკვე ანაზღაურებული პერიოდის განმავლობაში სერვისზე წვდომაზე.

7.4. გაუქმება: მომხმარებელს უფლება აქვს გააუქმოს ფასიანი (Premium) გამოწერა ნებისმიერ დროს, საკუთარი პროფილის პარამეტრების მენიუდან. გაუქმების შემდეგ, ფასიან (Premium) ფუნქციებზე წვდომა შენარჩუნდება მიმდინარე უკვე ანაზღაურებული პერიოდის დასრულებამდე, ხოლო შემდგომი პერიოდული ჩამოჭრა შეწყდება.

7.5. ერთჯერადი, სამუდამო წვდომის პაკეტი (Loyality):

7.5.1. Loyality წარმოადგენს ერთჯერადი გადახდით შეძენილ პაკეტს და არ არის გამოწერა: მას არ აქვს საანგარიშსწორებო პერიოდი, ავტომატურად არ განახლდება და მისი შეძენისას საბანკო ბარათი ავტომატური ჩამოჭრის მიზნით არ ინახება.

7.5.2. „სამუდამო წვდომა“ ნიშნავს წვდომას პლატფორმის ფუნქციონირების მთელი პერიოდის განმავლობაში, დამატებითი პერიოდული გადახდის გარეშე. პაკეტის შეძენა არ ზღუდავს მეწარმის უფლებას, განავითაროს, შეცვალოს ან შეწყვიტოს ცალკეული ფუნქცია წინამდებარე წესებისა და დისკლეიმერის შესაბამისად; თუ ასეთი ცვლილება არსებითად ამცირებს პაკეტის ღირებულებას მომხმარებლისთვის, მოქმედებს დისკლეიმერის 3.4 პუნქტით დადგენილი წესი.

7.5.3. Loyality პაკეტის ფლობისას სხვა ფასიანი პაკეტის (Plus/Pro) შეძენა შეუძლებელია, ვინაიდან Loyality მოიცავს მათ ფუნქციონალს. დაუშვებელია აგრეთვე Loyality პაკეტის განმეორებით შეძენა.

7.5.4. თუ Loyality პაკეტის შეძენის მომენტისთვის მომხმარებელს აქვს მოქმედი პერიოდული გამოწერა (Plus/Pro), ეს გამოწერა უქმდება, ხოლო ავტომატური განახლებისთვის შენახული ბარათი იშლება. უკვე ანაზღაურებული, მაგრამ გამოუყენებელი პერიოდის თანხა ამ შემთხვევაში არ ბრუნდება და არ კომპენსირდება. მომხმარებელი ამის შესახებ ინფორმირდება შეძენის დადასტურებამდე და, თუ აღნიშნული პირობა მისთვის მიუღებელია, უფლებამოსილია Loyality პაკეტი შეიძინოს მოქმედი გამოწერის დასრულების შემდეგ.

7.6. პაკეტის შეცვლის წესები:

7.6.1. იმავე პაკეტის განმეორებით შეძენა არ ქმნის ახალ, პარალელურ გამოწერას — იგი აგრძელებს მიმდინარე გამოწერის ვადას შეძენილი პერიოდით. ამავე წესით ხორციელდება ყოველთვიური გამოწერის ყოველწლიურზე გადაყვანა.

7.6.2. უფრო მაღალ პაკეტზე გადასვლისას (Plus → Pro) მიმდინარე პაკეტის გამოუყენებელი დღეები არ იკარგება — ისინი ემატება ახლად შეძენილ პერიოდს. თანხის პროპორციული გადაანგარიშება ამ შემთხვევაში არ ხორციელდება.

7.6.3. უფრო დაბალ პაკეტზე გადასვლისას (Pro → Plus) ახალი პაკეტი ძალაში შედის მხოლოდ მიმდინარე, უფრო მაღალი პაკეტის ვადის ამოწურვის შემდეგ. შესაბამისად, მომხმარებელი თანხას იხდის შეძენისთანავე, ხოლო მომსახურებით სარგებლობას იწყებს მოგვიანებით, მითითებული თარიღიდან; მიმდინარე პაკეტის თანხა არ ბრუნდება. ახალი პაკეტის ამოქმედების თარიღი მომხმარებელს ეცნობება შეძენის დადასტურებამდე.

7.6.4. დაბლოკილი ანგარიშიდან ფასიანი პაკეტის შეძენა შეუძლებელია.

7.6.5. ამ მუხლით დადგენილი შეზღუდვები (მათ შორის 7.5.3 და 7.6.3 პუნქტები) არ ზღუდავს მომხმარებლის უფლებას, ისარგებლოს მე-9 მუხლით გათვალისწინებული ხელშეკრულებაზე უარის თქმის უფლებით.

8. მიწოდების პირობები

8.1. ციფრული მომსახურების მიწოდება: ფასიანი (Premium) სერვისი, როგორც მიმდინარე ციფრული მომსახურება, მომხმარებელს ხელმისაწვდომი ხდება თანხის გადახდისთანავე, პლატფორმის მეშვეობით, გრძელდება გამოწერის პერიოდის განმავლობაში და არ საჭიროებს ფიზიკურ მიწოდებას.

8.2. ქულებით გადაცვლილი ნივთების მიწოდება: აპლიკაციაში დაგროვებული ქულებით გადაცვლილ ნივთებს მომხმარებელი იღებს მიწოდების სახით, კონკრეტულ ლოკაციებზე, მომხმარებელთან წინასწარი შეთანხმების საფუძველზე, დღის განმავლობაში, შემდეგი ვადების დაცვით:

8.2.1. ქალაქ თბილისში — ქულების ნივთზე გადაცვლიდან უახლოესი 48 (ორმოცდარვა) საათის განმავლობაში;

8.2.2. საქართველოს რეგიონებში — ნივთი გაიგზავნება საფოსტო გზავნილის სახით, გადაცვლიდან გონივრულ ვადაში; მიწოდების ვადა ამ შემთხვევაში დამოკიდებულია საფოსტო მომსახურების მიმწოდებელზე.

8.3. მიწოდების ზუსტი ლოკაცია და დრო თანხმდება მომხმარებელთან წინამდებარე წესების მე-16 მუხლში მითითებული საკონტაქტო არხების ან პლატფორმის შიდა კომუნიკაციის მეშვეობით, მეწარმის სამუშაო საათებში.

8.4. Wild ქულები (შემდგომში „ქულები“) წარმოადგენს პლატფორმის ლოიალობის/წამახალისებელი პროგრამის პირობით ერთეულს. ქულებს არ გააჩნია ფულადი ღირებულება, არ არის ელექტრონული ფული ან საგადახდო საშუალება, არ განაღდდება ფულად და არ გადაეცემა/გასხვისდება სხვა მომხმარებელზე, გარდა პლატფორმის მიერ პირდაპირ დაშვებული შემთხვევებისა.

8.5. ქულების გადაცვლა შესაძლებელია მხოლოდ პლატფორმის მიერ განსაზღვრულ კატალოგში, რომელიც მოიცავს ბრენდირებულ ნივთებს, ფასდაკლებებსა და ბონუსებს, აგრეთვე ციფრულ ჯილდოებს. ქულებით არ გაიცემა და არ იცვლება იარაღი, საბრძოლო მასალა, მათი ნაწილები ან აქსესუარები, აგრეთვე ნებისმიერი სხვა კანონით რეგულირებადი ან სანებართვო პროდუქტი. ეს შეზღუდვა შეესაბამება ამ წესების 4.2 პუნქტს.

8.5.1. კატალოგში ნივთის/ჯილდოს ფასი ქულებში განისაზღვრება შემდეგი საანგარიშო თანაფარდობით: 1 000 (ერთი ათასი) ქულა შეესაბამება 1 (ერთი) ლარის ღირებულების ნივთს, შესაბამისად 100 ქულა — 0,1 ლარს, 10 000 ქულა — 10 ლარს, ხოლო 1 000 000 ქულა — 1 000 ლარს. აღნიშნული თანაფარდობა გამოიყენება მხოლოდ კატალოგში ფასის დასადგენად და მომხმარებლისთვის ჯილდოს მასშტაბის გასაგებად.

8.5.2. ამ წესების 8.5.1 პუნქტით განსაზღვრული თანაფარდობა არ ცვლის 8.4 პუნქტს: ქულა რჩება პირობით ერთეულად, მას არ გააჩნია ფულადი ღირებულება, არ არის ელექტრონული ფული ან საგადახდო საშუალება, არ განაღდდება და არ იცვლება ფულზე. მეწარმე უფლებამოსილია შეცვალოს აღნიშნული თანაფარდობა სამომავლოდ, რის შესახებაც მომხმარებელი ინფორმირდება 15.1 პუნქტის შესაბამისად; ცვლილება არ ვრცელდება უკვე განხორციელებულ გადაცვლაზე.

8.6. ქულების გაუქმება და ჩამოჭრა: მეწარმე უფლებამოსილია გააუქმოს ან ჩამოაჭრას მომხმარებელს მინიჭებული ქულები, თუ:

8.6.1. ქულები მინიჭებულია ფასიან შენაძენთან დაკავშირებით და ამ შენაძენის თანხა სრულად ან ნაწილობრივ დაუბრუნდა მომხმარებელს ან გასაჩივრდა საგადახდო სისტემის მეშვეობით (chargeback). ამ შემთხვევაში ჩამოიჭრება შენაძენის საფუძველზე გაცემული ქულები, მათ შორის სარეფერალო პროგრამის ფარგლებში ამავე შენაძენისთვის გაცემული ქულები;

8.6.2. ქულები მოპოვებულია წინამდებარე წესების დარღვევით, მრავლობითი (გაორებული) ანგარიშით, ავტომატიზებული საშუალებით ან სხვაგვარად ბოროტად გამოყენებით;

8.6.3. სახეზეა დისკლეიმერის 20.2 პუნქტით გათვალისწინებული შემთხვევა.

8.6.4. ჩამოჭრა ხორციელდება მხოლოდ ქულების არსებული ნაშთის ფარგლებში — ნაშთი უარყოფითი არ ხდება და უკვე გამოყენებული ქულის ფულადი ანაზღაურება მომხმარებელს არ ეკისრება. ჩამოჭრის შესახებ მომხმარებელი ინფორმირდება და უფლებამოსილია გაასაჩივროს გადაწყვეტილება 16.1 პუნქტით განსაზღვრულ ელექტრონულ ფოსტაზე.

8.7. სარეფერალო (მოწვევის) პროგრამა:

8.7.1. პლატფორმა მომხმარებელს სთავაზობს პირადი სარეფერალო კოდის გაზიარებას. კოდის გამოყენებისთვის ქულებს იღებს როგორც მოწვეული, ისე მომწვევი მომხმარებელი — იმ ოდენობითა და პირობებით, რომლებიც გამოქვეყნებულია პლატფორმის შესაბამის გვერდზე.

8.7.2. აკრძალულია საკუთარი კოდის გამოყენება (თვითრეფერალი).

8.7.3. სარეფერალო კოდის გააქტიურება ერთჯერადია — თითოეულ მომხმარებელს კოდის გამოყენება შეუძლია მხოლოდ ერთხელ. ეს შეზღუდვა ძალაში რჩება ანგარიშის წაშლის შემდეგაც, რისთვისაც მეწარმე ინახავს ელექტრონული ფოსტის შეუქცევად ჰეშს კონფიდენციალურობის პოლიტიკის 7.4 პუნქტით დადგენილი წესით.

8.7.4. მომწვევის დამატებითი (საფეხურებრივი) ჯილდო გაიცემა მხოლოდ მოწვეული მომხმარებლის ფასიანი შენაძენის საფუძველზე და მხოლოდ იმ შემთხვევაში, თუ შენაძენი შენარჩუნდა პროგრამის პირობებით დადგენილი ვადით, თანხის დაბრუნების გარეშე.

8.7.5. თაღლითობის პრევენციის მიზნით საფეხურებრივ ჯილდოში არ ჩაითვლება ის მოწვეული ანგარიში, რომელიც მომწვევთან ან უკვე ჩათვლილ სხვა მოწვეულთან იზიარებს ერთსა და იმავე IP მისამართს ან ერთსა და იმავე საგადახდო ბარათს. აღნიშნული შეზღუდვა არ ვრცელდება კოდის გამოყენებისთვის გაცემულ ძირითად ქულებზე, რომლებიც მომხმარებელს უნარჩუნდება.

8.7.6. მეწარმე უფლებამოსილია ნებისმიერ დროს შეცვალოს ან შეწყვიტოს სარეფერალო პროგრამა და მისი პირობები, აგრეთვე გააუქმოს ბოროტად გამოყენებით მოპოვებული ჯილდო 8.6 პუნქტის შესაბამისად. პროგრამის შეცვლა არ ეხება უკვე სამართლიანად მიღებულ ქულებს.

9. ხელშეკრულებაზე უარის თქმა და თანხის დაბრუნება

9.1. თანხის დაბრუნება ხორციელდება საქართველოს „მომხმარებლის უფლებების დაცვის შესახებ“ კანონით გათვალისწინებულ ვადებში და პირობებით, კერძოდ:

9.1.1. დისტანციური ხელშეკრულების შემთხვევაში მომხმარებელს უფლება აქვს, ყოველგვარი საფუძვლის მითითების გარეშე, უარი თქვას ხელშეკრულებაზე 14 (თოთხმეტი) კალენდარული დღის განმავლობაში (მომსახურების ხელშეკრულების შემთხვევაში — ხელშეკრულების დადებიდან, ხოლო საქონლის შემთხვევაში — საქონლის მფლობელობაში მიღებიდან);

9.1.2. ხელშეკრულებაზე უარის თქმის შესახებ მომხმარებელმა მეწარმეს უნდა აცნობოს წერილობით — ელ-ფოსტის (hello@wildera.ge) მეშვეობით ან აპლიკაციის შიდა ფუნქციით („თანხის დაბრუნების მოთხოვნა“); ორივე არხს თანაბარი ძალა აქვს და შეტყობინების მიღების თარიღად ჩაითვლება რომელიმე მათგანით მოთხოვნის წარდგენის დღე;

9.1.3. მეწარმე ვალდებულია მომხმარებელს დაუბრუნოს გადახდილი თანხა ხელშეკრულებაზე უარის თქმის შესახებ შეტყობინების მიღებიდან არაუგვიანეს 14 (თოთხმეტი) კალენდარული დღისა, იმავე გადახდის საშუალებით, რომლითაც განხორციელდა გადახდა, გარდა იმ შემთხვევისა, თუ მხარეები სხვა რამეზე შეთანხმდებიან;

9.1.4. ფიზიკური ნივთის (საქონლის) დაბრუნების შემთხვევაში, მეწარმე უფლებამოსილია, უარი თქვას თანხის დაბრუნებაზე მანამ, სანამ ნივთს არ დაიბრუნებს; მომხმარებელი ვალდებულია ნივთი დააბრუნოს ხელშეკრულებაზე უარის თქმის შესახებ შეტყობინების გაგზავნიდან არაუგვიანეს 7 (შვიდი) კალენდარული დღისა.

9.2. ფასიანი (Premium) გამოწერა, როგორც მიმდინარე (უწყვეტი) ციფრული მომსახურება: ფასიანი (Premium) გამოწერა (Pro/Plus) წარმოადგენს მიმდინარე, უწყვეტ ციფრულ მომსახურებას, რომელიც მომხმარებელს მიეწოდება საანგარიშსწორებო პერიოდის (ყოველთვიური ან ყოველწლიური) განმავლობაში და არ არის ხელშეკრულების დადებისთანავე სრულად შესრულებული. შესაბამისად, მომხმარებელს უნარჩუნდება ამ მუხლის 9.1 პუნქტით გათვალისწინებული 14-დღიანი უფლება. თუ მომხმარებელი წინასწარ, პირდაპირ მოითხოვს მომსახურების დაუყოვნებლივ დაწყებას 14-დღიანი ვადის განმავლობაში და შემდგომ ამავე ვადაში უარს იტყვის ხელშეკრულებაზე, იგი იხდის მხოლოდ იმ პროპორციულ თანხას, რომელიც შეესაბამება უარის თქმის მომენტისთვის ფაქტობრივად მიწოდებულ მომსახურებას, ხოლო დანარჩენი გადახდილი თანხა უბრუნდება არაუგვიანეს 14 კალენდარული დღისა.

9.2.1. 14-დღიანი ვადის გასვლის შემდეგ ან გამოწერის მომდევნო პერიოდზე ავტომატური განახლების შემდეგ, გამოწერის გაუქმება წყვეტს მომავალ პერიოდულ ჩამოჭრას (იხ. 7.4 პუნქტი), თუმცა უკვე დაწყებული და ანაზღაურებული მიმდინარე პერიოდის თანხა არ ბრუნდება, გარდა კანონით გათვალისწინებული შემთხვევებისა (მაგალითად, სერვისის არსებითი ნაკლი).

9.2.2. ცალკეული, ერთჯერადი ციფრული ნივთი, რომელიც მიეწოდება არამატერიალური მატარებლით და გადაეცემა მომენტალურად (მაგალითად, ქულებით მიღებული ციფრული ჯილდო), მისი მიწოდების დაწყების შემდეგ არ ექვემდებარება 14-დღიან უარის უფლებას მხოლოდ იმ შემთხვევაში, თუ მიწოდება დაიწყო მომხმარებლის წინასწარი, პირდაპირი თანხმობით და მან იცოდა, რომ ამით კარგავს უარის თქმის უფლებას.

9.2.3. თანხის დაბრუნება ნებისმიერ შემთხვევაში ხორციელდება, თუ სერვისი ტექნიკურად გაუმართავია და მეწარმე ვერ უზრუნველყოფს მის მიწოდებას გონივრულ ვადაში.

9.2.4. ერთჯერადი, სამუდამო წვდომის პაკეტზე (Loyality) აგრეთვე ვრცელდება 9.1 პუნქტით გათვალისწინებული 14-დღიანი უფლება, რომელიც აითვლება გადახდის დღიდან. ამ ვადაში უარის თქმისას მომხმარებელს უბრუნდება გადახდილი თანხა, ხოლო პაკეტით მინიჭებული წვდომა და მისი თანმდევი სარგებელი უქმდება.

9.3. ფიზიკური ნივთის (საქონლის) დაბრუნების დამატებითი პირობები:

9.3.1. ხელშეკრულებაზე უარის თქმისას ნივთის უკან დაბრუნების პირდაპირ (უშუალო) ხარჯს ანაზღაურებს მომხმარებელი, გარდა იმ შემთხვევისა, როდესაც მეწარმემ თავად იკისრა ეს ხარჯი ან მომხმარებელს წინასწარ არ მიაწოდა ინფორმაცია ამ ვალდებულების შესახებ;

9.3.2. თუ ნივთი ნაკლიანია, დაზიანებულია მიწოდებისას, არ შეესაბამება შეკვეთას ან აღწერას, მისი შეკეთების, შეცვლის ან უკან დაბრუნების ხარჯს ანაზღაურებს მეწარმე; მომხმარებელი უფლებამოსილია მოითხოვოს ნივთის უსასყიდლოდ შეკეთება ან შეცვლა, ხოლო კანონით დადგენილ შემთხვევებში — ფასის შემცირება ან თანხის დაბრუნება;

9.3.3. ქულებით მიღებულ ნივთებზე: ვინაიდან ასეთი ნივთი მიღებულია Wild ქულებით და არა ფულადი გადახდით, ხელშეკრულებაზე უარის თქმისას ან ნაკლის შემთხვევაში მომხმარებელს უბრუნდება შესაბამისი ქულები (ან მათი ეკვივალენტი) ფულადი თანხის ნაცვლად; ნივთი უნდა დაბრუნდეს სრული, გამოუყენებელი და სასაქონლო სახით, ორიგინალი შეფუთვით, თუ მისი ბუნება სხვას არ განაპირობებს.

9.4. თანხის დაბრუნების მოთხოვნის განხილვის წესი:

9.4.1. მოთხოვნის მიღების შემდეგ მეწარმე ამოწმებს მის შესაბამისობას წინამდებარე მუხლით დადგენილ პირობებთან. 9.1 პუნქტით გათვალისწინებული უფლების ფარგლებში წარდგენილი მოთხოვნა კმაყოფილდება, ხოლო თანხა ბრუნდება არაუგვიანეს 14 (თოთხმეტი) კალენდარული დღისა შეტყობინების მიღებიდან.

9.4.2. მოთხოვნაზე უარის თქმა დასაშვებია მხოლოდ დასაბუთებულ შემთხვევაში (მაგალითად, კანონით დადგენილი ვადის გასვლისას ან წინამდებარე წესებით გათვალისწინებული გამონაკლისის არსებობისას). უარის შესახებ მომხმარებელი ინფორმირდება მიზეზის მითითებით და უფლებამოსილია გაასაჩივროს იგი 15.3 პუნქტით განსაზღვრული წესით.

9.4.3. თანხის დაბრუნების დასრულებისთანავე შესაბამისი ფასიანი პაკეტით მინიჭებული წვდომა უქმდება, ხოლო მომხმარებლის სტატუსი გადაითვლება სხვა, ძალაში დარჩენილი საფუძვლების შესაბამისად. ამავე დროს ჩამოიჭრება ამ შენაძენთან დაკავშირებით მინიჭებული ქულები 8.6.1 პუნქტის შესაბამისად.

9.4.4. ალტერნატიული შეთავაზება: თანხის დაბრუნების მოთხოვნის დაწყებისას მეწარმემ შესაძლოა შესთავაზოს მომხმარებელს გამოწერის ვადის უსასყიდლოდ გაგრძელება 1 (ერთი) თვით, თანხის დაბრუნების ნაცვლად. შეთავაზების მიღება მომხმარებლის ნებაყოფლობითი არჩევანია, ხელმისაწვდომია თითოეულ გამოწერაზე ერთხელ და მისი მიღება ხურავს მიმდინარე მოთხოვნას. შეთავაზებაზე უარი არავითარ გავლენას არ ახდენს 9.1 პუნქტით გათვალისწინებულ კანონიერ უფლებაზე და მისი მიღება სავალდებულო არ არის.

10. პასუხისმგებლობის შეზღუდვა

10.1. მომხმარებელი აცნობიერებს, რომ ველურ ბუნებაში გადაადგილება, ნადირობა და თევზაობა დაკავშირებულია გარკვეულ რისკებთან.

10.2. მომხმარებელი თავადაა პასუხისმგებელი ნადირობისა და თევზაობის კანონიერებაზე, ვადების, ლიმიტების, წესების დაცვასა და საჭირო ნებართვების/ლიცენზიების ქონაზე.

10.3. პლატფორმაზე განთავსებული ნებისმიერი საინფორმაციო მასალა (სანადირო ზონების საზღვრები, აკრძალული ტერიტორიები, სეზონების კალენდარი) არის მხოლოდ დამხმარე, სარეკომენდაციო ხასიათის. ქვეყანაში მოქმედი სანადირო და სათევზაო ვადების, ზონებისა და რეგულაციების ერთადერთ ოფიციალურ იურიდიულ წყაროს წარმოადგენს საქართველოს გარემოს დაცვისა და სოფლის მეურნეობის სამინისტრო. მომხმარებელი ვალდებულია ნებისმიერი აქტივობის დაწყებამდე დამოუკიდებლად გადაამოწმოს ინფორმაციის სიზუსტე ოფიციალურ სახელმწიფო უწყებებში.

10.4. მეწარმე და მასთან აფილირებული პირები არ იღებენ პასუხისმგებლობას:

10.4.1. მომხმარებლის მიერ ველურ ბუნებაში ყოფნისას მიღებულ ფიზიკურ ტრავმებზე, ჯანმრთელობის დაზიანებაზე ან ფატალურ შემთხვევებზე;

10.4.2. მომხმარებლის მატერიალურ ზიანზე, აღჭურვილობის ან სატრანსპორტო საშუალებების დაზიანებაზე;

10.4.3. სახელმწიფო ორგანოების მხრიდან მომხმარებლისთვის დაკისრებულ ადმინისტრაციულ ჯარიმებზე, კონფისკაციაზე ან სისხლისსამართლებრივ პასუხისმგებლობაზე (ბრაკონიერობის ან იარაღის ბრუნვის წესების დარღვევის გამო).

10.5. პლატფორმა მომხმარებელს მიეწოდება „როგორც არის“ და „როგორც ხელმისაწვდომია“ პრინციპით. მეწარმე არ იძლევა გარანტიას, რომ პლატფორმა იმუშავებს შეუფერხებლად, რომ მუდმივად ხელმისაწვდომი იქნება გეოლოკაციური კავშირი (განსაკუთრებით სპეციფიკურ რელიეფურ ზონებში) ან მონაცემები ყოველთვის იქნება დაცული ტექნიკური შეცდომებისგან.

10.6. წინამდებარე წესების განუყოფელ ნაწილს წარმოადგენს განცხადება პასუხისმგებლობის შეზღუდვის შესახებ (დისკლეიმერი), რომელიც აზუსტებს ამ მუხლით გათვალისწინებულ პასუხისმგებლობის შეზღუდვას და ხელმისაწვდომია პლატფორმაზე.

11. მესამე მხარის ბმულები

11.1. პლატფორმა შესაძლოა შეიცავდეს ბმულებს მესამე მხარის ვებ-გვერდებზე ან რესურსებზე. მეწარმე არ არის პასუხისმგებელი ამ გარე პლატფორმების შინაარსზე, უსაფრთხოებაზე, ფუნქციონირებასა თუ მათ მიერ პერსონალური მონაცემების დამუშავების პრაქტიკაზე.

12. ანგარიშის შეჩერება და გაუქმება

12.1. მომხმარებელს უფლება აქვს ნებისმიერ დროს შეწყვიტოს პლატფორმით სარგებლობა და მოითხოვოს საკუთარი ანგარიშის წაშლა აპლიკაციის შიდა მენიუდან ან ელ-ფოსტაზე წერილობითი მიმართვის საფუძველზე.

12.2. მეწარმე იტოვებს უფლებას, ცალმხრივად, წინასწარი შეტყობინების გარეშე, შეუზღუდოს წვდომა, დროებით შეაჩეროს ან სრულად გააუქმოს მომხმარებლის ანგარიში, თუ არსებობს საფუძვლიანი ეჭვი, რომ მომხმარებელმა დაარღვია წინამდებარე წესები, ეწევა არაკანონიერ ქმედებას, ან საფრთხეს უქმნის პლატფორმისა და მისი სხვა წევრების უსაფრთხოებასა და ინტერესებს.

13. პერსონალურ მონაცემთა დაცვა

13.1. მომხმარებლის პერსონალური მონაცემების (მათ შორის: სახელი, ელ-ფოსტა, ფოტოები, GPS გეოლოკაცია) შეგროვება, დამუშავება, შენახვა და დაცვა ხორციელდება საქართველოს კანონის „პერსონალურ მონაცემთა დაცვის შესახებ“ მოთხოვნათა სრული დაცვით.

13.2. მონაცემთა დამუშავების დეტალური მიზნები, სამართლებრივი საფუძვლები და მომხმარებლის უფლებები გაწერილია კონფიდენციალურობის პოლიტიკაში, რომელიც წარმოადგენს ამ წესებისა და პირობების განუყოფელ ნაწილს და ხელმისაწვდომია პლატფორმის მენიუში.

14. წესების ცვლილება

14.1. მეწარმე უფლებამოსილია, საკუთარი შეხედულებისამებრ და საქართველოს მოქმედი კანონმდებლობის შესაბამისად, ნებისმიერ დროს შეცვალოს, დაამატოს ან განაახლოს წინამდებარე წესები. ცვლილებების შესახებ ინფორმაცია განთავსდება პლატფორმაზე და ძალაში შევა გამოქვეყნებისთანავე.

14.2. არსებითი ხასიათის ცვლილებების შემთხვევაში, მეწარმე უზრუნველყოფს მომხმარებლის წინასწარ ინფორმირებას პლატფორმის შიდა შეტყობინების ან ელ-ფოსტის მეშვეობით. ცვლილებების ძალაში შესვლის შემდეგ პლატფორმის გამოყენების გაგრძელება მიიჩნევა მომხმარებლის მიერ განახლებულ პირობებზე სრულ და უპირობო თანხმობად.

15. მოქმედი სამართალი და დავის გადაწყვეტა

15.1. წინამდებარე წესები და პირობები რეგულირდება, განიმარტება და სრულდება საქართველოს მოქმედი კანონმდებლობის შესაბამისად.

15.2. ნებისმიერი უთანხმოება, დავა ან პრეტენზია, რომელიც წარმოიშობა ამ წესებიდან ან პლატფორმის გამოყენებიდან, მხარეთა მიერ უნდა გადაწყდეს ურთიერთმოლაპარაკების გზით, კეთილსინდისიერების პრინციპების დაცვით.

15.3. მოლაპარაკების გზით შეთანხმების მიუღწევლობის შემთხვევაში, დავა განსახილველად გადაეცემა თბილისის საქალაქო სასამართლოს. მომხმარებელს (ფიზიკურ პირს) ასევე აქვს კანონით მინიჭებული უფლება, სადავო საკითხებთან დაკავშირებით მიმართოს სსიპ „საქართველოს კონკურენციისა და მომხმარებლის დაცვის სააგენტოს“.

16. „იარე და დააგროვე“ (ნაბიჯების აქტივობის პროგრამა)

16.1. პლატფორმა სთავაზობს PRO და LOYALITY სტატუსის მქონე მომხმარებლებს არასავალდებულო ფუნქციას „იარე და დააგროვე“, რომლის ფარგლებშიც ბუნებაში ფეხით გადაადგილებისთვის ერიცხებათ გამოცდილების ქულები (XP) და Wild ქულები. ფუნქციის გამოყენება ნებაყოფლობითია და არ წარმოადგენს პლატფორმით სარგებლობის პირობას.

16.2. ფუნქციის მუშაობისთვის აუცილებელია მომხმარებლის მოწყობილობის ადგილმდებარეობაზე (GPS) წვდომის ნებართვა. ნებართვის გაცემა და მისი ნებისმიერ დროს გამოთხოვა ხდება მომხმარებლის შეხედულებისამებრ; ნებართვის გარეშე ფუნქცია არ მუშაობს, ხოლო პლატფორმის დანარჩენი სერვისები ხელმისაწვდომი რჩება.

16.3. ნაბიჯების რაოდენობას ითვლის მეწარმის სერვერი, მოწყობილობიდან მიღებული ადგილმდებარეობის წერტილების (კოორდინატი, დრო, სიგნალის სიზუსტე) საფუძველზე. მომხმარებლის მოწყობილობის ან მესამე მხარის აპლიკაციის მიერ გამოთვლილი მაჩვენებელი ქულის დარიცხვის საფუძველი არ არის.

16.4. ქულა ერიცხება მხოლოდ იმ მონაკვეთზე, რომელიც აკმაყოფილებს ყველა შემდეგ პირობას: (ა) გადაადგილების სიჩქარე შეესაბამება ადამიანის ფეხით სიარულს; (ბ) მონაკვეთი მდებარეობს დასახლებული პუნქტის (ქალაქი, დაბა, სოფელი და სხვა დასახლება) საზღვრებისა და აპლიკაციაში მითითებული ბუფერული ზონის გარეთ; (გ) GPS სიგნალის ცდომილება არ აღემატება აპლიკაციაში მითითებულ ზღვარს; (დ) დაცულია მონაცემთა გადაცემის უწყვეტობა აპლიკაციაში მითითებული ინტერვალის ფარგლებში.

16.5. ერთ ჯილდოზე საჭირო ნაბიჯების რაოდენობა, დარიცხვის ოდენობა, დღიური ლიმიტი, საფეხურები (კოეფიციენტები) და დანარჩენი პარამეტრები მითითებულია უშუალოდ აპლიკაციაში, ფუნქციის გვერდზე. მეწარმე უფლებამოსილია ისინი ნებისმიერ დროს შეცვალოს; ცვლილება ვრცელდება მისი ძალაში შესვლის შემდეგ განხორციელებულ აქტივობაზე და არ ეხება უკვე დარიცხულ ქულას.

16.6. აკრძალულია ფუნქციის ბოროტად გამოყენება, მათ შორის: ადგილმდებარეობის გაყალბება ან იმიტირება (პროგრამული თუ ტექნიკური საშუალებით), ერთი ანგარიშის რამდენიმე მოწყობილობაზე ერთდროულად გამოყენება, მონაცემების განმეორებითი, ავტომატიზებული ან ხელოვნურად გენერირებული გაგზავნა, მოწყობილობის ხელოვნურად მოძრაობაში მოყვანა, აგრეთვე ნებისმიერი სხვა ქმედება, რომელიც მიზნად ისახავს ქულის მიღებას რეალური ფეხით გადაადგილების გარეშე.

16.7. 16.6 პუნქტის დარღვევის შემთხვევაში მეწარმე უფლებამოსილია გააუქმოს შესაბამისი დარიცხვა, შეზღუდოს მომხმარებლისთვის ფუნქციაზე წვდომა და, დარღვევის სიმძიმის გათვალისწინებით, გამოიყენოს ამ წესების მე-12 მუხლით გათვალისწინებული ზომები.

16.8. ფუნქციით დარიცხული ქულები ექვემდებარება ამ წესების 8.4 და 8.5 პუნქტებს: Wild ქულა წარმოადგენს ლოიალობის ერთეულს, არ არის ფულადი სახსარი ან ელექტრონული ფული, არ ექვემდებარება განაღდებას და მისი გამოყენება შესაძლებელია მხოლოდ პლატფორმის ფარგლებში.

16.9. მომხმარებელი აცნობიერებს, რომ ფუნქცია არ წარმოადგენს სამედიცინო, სპორტულ ან საზომ ხელსაწყოს. ნაბიჯების მაჩვენებელი მიახლოებითია და დამოკიდებულია მოწყობილობის GPS სიგნალის ხარისხზე, გარემო პირობებსა და ბრაუზერის/ოპერაციული სისტემის შეზღუდვებზე.

16.10. ბუნებაში გადაადგილებისას მომხმარებელი მოქმედებს საკუთარი რისკითა და პასუხისმგებლობით და ვალდებულია დაიცვას უსაფრთხოების, საგზაო მოძრაობისა და გარემოს დაცვის წესები. მეწარმე არ არის პასუხისმგებელი ფუნქციის გამოყენებისას მომხმარებლის ჯანმრთელობისთვის ან ქონებისთვის მიყენებულ ზიანზე, გარდა იმ შემთხვევისა, როდესაც ზიანი მეწარმის განზრახი ქმედების ან უხეში გაუფრთხილებლობის შედეგია.

16.11. მეწარმე უფლებამოსილია ნებისმიერ დროს შეაჩეროს, შეცვალოს ან შეწყვიტოს ფუნქციის მუშაობა, აგრეთვე შეზღუდოს მისი ხელმისაწვდომობა მომხმარებელთა ცალკეული კატეგორიისთვის. ამ შემთხვევაში უკვე დარიცხული ქულა არ უქმდება.

17. საკონტაქტო ინფორმაცია და სამუშაო საათები

17.1. წინამდებარე წესებთან დაკავშირებული ნებისმიერი შეკითხვის, პრეტენზიის ან შეტყობინების გამოსაგზავნად, აგრეთვე მომსახურების მისაღებად, გთხოვთ, დაუკავშირდეთ მეწარმეს:

● მომსახურე ბიზნეს სუბიექტი: ინდივიდუალური მეწარმე „გურამ თევდორაშვილი“

● მისამართი: საგარეჯო, სოფელი მანავი

● ელექტრონული ფოსტა: hello@wildera.ge

● ოფიციალური ვებ-გვერდი: wildera.ge

● სოციალური გვერდი: https://www.facebook.com/wilderaofficial

● სამუშაო საათები: 12:00 – 19:00

მითითებულ სამუშაო საათებში მომხმარებელს შეუძლია დაუკავშირდეს მეწარმეს ელექტრონული კომუნიკაციის მეშვეობით. სამუშაო საათების მიღმა მიღებული წერილობითი მიმართვები განიხილება მომდევნო სამუშაო დღეს.